كلنا نعرف مؤخرًا بانتشار الإعلانات مع المشاهير في وسائل التواصل الاجتماعي وبالذات على التطبيق الأصفر " سناب شات " وكيف صارت قوية ولعبة بمعادلة العرض والطلب بالسوق والكل يبي الشي اللي يقدمه يظهر في هذي الشاشة الصغيرة مهما كلّف الثّمن، بس .. فيه نقطة الأغلب من أصحاب الأعمال يجهلها وبعض مدراء التسويق و وجب علينا في أماز توضيحها ونشرها.

اللي ما تعرفه يا طويل العمر إن فيه فرق بين المشهور والمؤثر مثل فرق السماء عن الأرض .. تعال نشوفه مع بعض...

المشهور والمؤثر نتفق إن كلهم يكونون معروفين في مجتمعهم أو في مجتمعات أكبر لكن المؤثر له قوة تأثير على المجتمع برأيه ومصداقيته ووثوق الناس فيه، المشهور هو مجرد إنسان معروف لا أكثر ولا أقل.

يعني بكذا نختار المؤثر ؟ برافو عليك، بس حتى المؤثر لازم يكون اختيارك له أدق وأصح مو أي مؤثر مشاهداته ومتابعينه عالية يعني صح، لازم تحفظ فلوسك عند الشخص الأنسب وتكون متأكد إن تكلفة الإعلان بترجع عليك بالأرباح. 

تعال ندرسها مع بعض .. نفترض إن عندك متجر مستحضرات تجميل، في البداية لازم تعرف جمهورك المستهدف وهم ( الإناث – الأعمار من 18 إلى 50 سنة – مهتمين بالجمال والموضة وأخر مستحضرات التجميل الجديدة في السوق ) فيكون اختيارك للمؤثر راجع لجمهورك؛ فبحكم جمهورك إناث فالمؤثر يجب أن تكون أنثى وفئتك العمرية متابعين لها فيه مؤثرات ولكن متابعينهم من كبار السن مثل أمي وأمك ومحتواهم مُقدم لهذه الفئة فاهتماماتهم بعيدة كل البعد عن متجرك. 

الموضوع بشكل عام بيعطيك نتايج لكن يحتاج إلى دراسه قبل تخسر فلوسك.